https://www.gulf-up.com/12-2017/1512260128181.gifhttps://www.gulf-up.com/12-2017/1512259723531.gif

الويفي للعموم و الميزانية للگووم

آخر تحديث : الخميس 7 ديسمبر 2017 - 4:23 صباحًا

الصحراء الآن : إبراهيم سيد الناجم

دائما نسمعو بشي ينگالو الإدارات العمومية و نسمعو كذالك بالمرافق العمومية و نسمعو بالساحات العمومية و نسمعو امللي بالمراحض العمومية،يغير “الويفي” العمومي ماگط سمعنا بيه سابگ ذا العام و ذا العام راني گايل لكم عن الا الله يعطينا خيرو انشاء الله،و منين سولنا عن اخبارو گال لنا حد عنها علامة من علامات شين السعد تظهر من كل 200 سنة.

بلاشك عنكم حتا انتوما كاملين اسمعتو بأخبار الويفي اللي لهي تعدل بلدية جهة العيون،بلدية مشاء اللة ماهي باخلا أشعيب شي من أشكال و انواع الرفاهية و تموناكت،اللي ماتلا خاصو منها يكون ويفي رباعي الدفع كيف وتت رئيس البلدية ذي الكحلة اللي شاريها من فظتو طبعا ماهي ذيك اللي شاريتها لو الدولة.

الويفي العمومي لهي اعود رقمو السري الا عند الاخ الرئيس ولا قيادة الحزب فالرباط ولا انصار الحزب فلعيون،اللي مصوت علينا لهي نخلوها اكونيكتي بيه و اللي ما صوت علينا التعبيات معرمات و ادير ايدو فلبنتو،و خالگين وحدين لا يحلمو بيه گع ،اللي هوما المعطلين المتشجنجين اياك ماتلا ينشرو لنا فيديواتهم فاليوتيوب و ينشرو صور وقفاتهم فالشوارع و طاسين عياطهم عنهم خاليين و ذاريين و حنا باحرين شنعدلو لهم من تموناكت كافي عنا طالسين لهم الويفي اللي ماهم جابرين باش اخلصو قهوة كانهم يجبروه،و الفئة الثانية ذوك الانفصاليين اللي لهي اتمو اصورو لنا فيديوات لعليات يلعبو معاهم البوليس و العسكر فالشارع و هوما اگولو لك ابطونا ذا ماهو البط ذا الا اللعب،و الفئة الثالثة ذوي الاحتياجات الخاصة حتى خوما ابانو عادو اعدلو الوقفات فالشارع و خايفينهم يعطو الرقم السري للمعطلين ولا الانفصاليين.

منين طلست الصحافة لعياط بخبر الويفي العمومي فلعيون،سولني صاحب لي سؤال و الصراحة حشمني،ما بيا عن ما عندي جواب لو،بالعكس،بيا باطل الا كنت شاك عنو عاقل مدة 28 عام و اكتشفت اليوم عنو عويليل احمسو الگايلة من أنهار،گالي هو ذا الويفي حد ادور يگبظ رقمو السري كانو اگيس مكتب رئيس البلدية؟ وحد كا عينو فالويفي ادور الا حقو من ميزانية خلاصو؟،عرفتو عن صاحبي ماهو عاقل!!! گلت لو أبلز عينيك و أصگل وذنيك ذو لكبرات و اسمع ذا اللي لهي نگولك :

الويفي لعاد اللي عمومي،و الساحات لعادت اللي عمومية،و لحباس لعادت اللي عمومية، باگي ياسر ماهو عمومي،و على راسه مسلتين ثنتين أساسيات لا تحلم گع انهار بيهم ولا تخمم فأخبارهم،اللولة مكتب الرئيس،لا يدخله الا المطهرين،و لعدت مانك من المطهرين تعود بعد مانك من المعطلين و لا الطامعين ولا المعاقين ولا الفقراء ولا المحتاجين،تعود الا من أهل البطون البطارين،ذوك اللي وتاتهم و كوستيماتهم زينين و حسباتهم البنكية من الفظة الياسرة ملانيين،و المسلة الثانية، اللي لا تحلم عنها عمومية اخليك لي،هي الميزانية،و الميزانية ذي تعود ياااسر من المال،يجتمعو وحدين الا من عائلة الرئيس و اعود معاهم الرئيس و اواسو عنهم يتناقشو و يدايگو و اعارضو و اگوم الرئيس ازبهر عليهم و أگول لهم ،يالله التصويت،و يرفدو ايديهم كااملين،كاهو للدعاء باش تطيح أسحاب،الا للدعاء باش تطيح الميزانية كانهم يتگاسموها، ايوا فهمتني ظرك يصويحبي؟

فالاخير،راني طالب من الاخ الرئيس عنو سابگ يطلس لشعيب الويفي،عنو اسولهم كان عندهم بعد باش يشرو تلفونات؟،لا يخلگ لك لخلگ لعروس الناس الفايتا،هوما آبخروها وهي…

و كما قال أحد الشُعراء المخضرمين الفيسبوكيين :

ذا أللي طراو المسؤولين…… اليوم اللصوص

بخصوصالويفي للمواطنين…..والميزانية للصوص

2017-12-07
admin